網紅的藏寶箱《Happiness is a butterfly》
♂：早晨
♀：早晨
♂：我地好似第一次過節日喎，唔計七月十四既話
♀：係啊，我地第一次見面就係七月十四喇，算唔算慶節先？
♂：我其實好耐無過中秋喇……以前都會同朋友去燒野食，去唱K玩通宵，依家老喇，真係係屋企過就算，之前幾年係外國都係一早就訓左
♀：今晚我同朋友有個派對，你……會唔會想同我一齊去？
♂：好啊，但我係咩身份去先？
♀：朋友，夠唔夠？
♂：但我唔識你班朋友喎，我去到只可以痴住你
♀：今晚人好多，有個仲追緊我，我想你令佢死左條心
♂：喂啊，可唔可以唔好咁老套先
♀：唔緊要，咁今晚我就比佢追下，咁好唔好？
♂：……要脅我咁話，不過我好喜歡幫朋友，呢個忙我幫硬喇，係呢，追你既人係咩人黎？
♀：富二代囉……正常人邊會溝我呢type先
♂：我真係唔明，點解永遠個組合都係咁
♀：外人睇咪就係咁囉，貪錢港女加富二代，人人都覺得，溝女有錢就得，呢行咁多人，拎左一部份既例子然後當晒成行既人都係咁，咪就係外人睇既野囉，有邊個會去分，有更大部份既人係正正常常搵個喜歡既人拍拖結婚先？
♂：其實我唔係話你……我明既，真係認識你我點會覺得你係咁
♀：車，你之前都話我係拜金嫁
♂：我諗過喇，當你搵到錢，有自己既生活格調，你都會想搵個同你同層次既人一齊，即係你喜歡歐洲，無理由要搵個長洲一齊嘛，大家價值觀唔同，咁點可以一齊呢
♀：價值觀呢樣野，唔單止係享受方面既，當你同人一齊做一間你好喜歡既米芝蓮餐廳，但成餐飯唔知講乜好，九唔搭八咁，你又食得開心咩？
♂：你之前講過，做一件事唔係睇件事，而係睇同邊個做嘛
♀：有人係做件事就好開心，只要係個件事，同邊個做都無問題，或者單純咁去享受件事係簡單少少
♂：有句野係形容緊呢件事，叫有情飲水飽
♀：我飲水係唔會飽囉，比起同個好喜歡既人日日飲水，我更想同喜歡既人每日探索世界既未知
♂：不如……過左疫情我地一齊去次旅行？
♀：你想去邊先？
♂：第一次旅行，我想陪你去想去既地方
♀：即係去邊都無所謂？
♂：無所謂，只要同你一齊去就得
♀：學到野喎
♂：我學習能力一向都高，但今次我亦係真心咁講，好似同你去邊同做乜都會好開心咁
♀：咁去日本啦，我真係好耐無去喇
♂：係唔係要行到斷腳個種？
♀：唔想行既去馬爾代夫啦！
♂：都好喎，係個島上面日日無野做，你眼望我眼咁
♀：好啊，你出錢既我同你去
♂：希望疫情唔係太快完，唔係我儲唔夠錢
♀：咁你陪我去日本，我包你！
♂：比人知道你包我去日本我會比人打死
♀：死都值得啦！仲益左你添啊！
♂：係呢，今晚邊度等？
♀：係喎，我都真係要化妝喇，你黎我屋企留下等我啦
♂：好，我換件衫過黎
♂：我到喇
♀：等我半個鐘
♂：好
♂：喂，一個鐘都黎緊喇
♀：我話你知，係值得你等既
♂：好，我就睇下我既時間係有幾值錢
♀：落樓
——
第二部·完
完整見面內容將於中秋翌日上載Patreon
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
Search